പലരും ഒരിക്കലെങ്കിലും നേരിടേണ്ടി വന്നിട്ടുള്ള പ്രശ്നങ്ങളിൽ ഒന്നാണ് *നടുവേദന*. നിസ്സാരമായവ മുതൽ  ചികിത്സിച്ചു ഭേദമാക്കുവാൻ പ്രയാസമുള്ള പ്രശ്നങ്ങൾ വരെ നടുവേദനയ്ക്ക് കാരണമാകാറുണ്ട്. കുട്ടികൾക്ക് അവരുടേതായ കാരണങ്ങൾ കൊണ്ടും മുതിർന്നവർക്ക് മറ്റ് പല കാരണങ്ങൾ കൊണ്ടും നടുവേദനയുണ്ടാകും. കുട്ടികളെന്നോ പ്രായമായവരെന്നോ ഉള്ള വ്യത്യാസമൊന്നും നടുവേദനയ്ക്കില്ല. പൊതുവെ ശാരീരികമായ വ്യത്യാസം കൊണ്ട് സ്ത്രീകൾക്കും മുതിർന്നവർക്കും നടുവേദനയുണ്ടാകുവാൻ സാദ്ധ്യത കൂടുതലുണ്ട് എന്ന് മാത്രമേ പറയാനാകൂ.

ചില സാഹചര്യങ്ങളിൽ മാത്രമേ നടുവേദന മാറ്റുവാൻ സർജറി  വേണ്ടി വരാറുള്ളു. അസ്ഥി മാംസങ്ങൾക്ക് ബലക്കുറവുള്ളവരും, കാൽസ്യത്തിൻറ അളവ് കുറവുള്ളവരും, സൈക്കിൾ അമിതമായി ചവിട്ടുക, അൽപം പോലും വെയിൽ കൊള്ളാതിരിക്കുക, ശരിയായ ഭക്ഷണം കഴിക്കാതിരിക്കുക, അമിതമായി ഡാൻസ് കളിക്കുക, അതുപോലെ കളികളിൽ ഏർപ്പെടുക, വല്ലപ്പോഴുമുള്ള വ്യായാമം തുടങ്ങിയവ ചെയ്യുന്ന കുട്ടികൾ നടുവേദന പറയാറുണ്ട്. ചിലർ ഇതോടൊപ്പം കാലിലെ അസ്ഥികൾക്കും വേദന പറയാറുണ്ട്. വളരുന്ന പ്രായത്തിൽ കാൽസ്യത്തിന്റെ അളവ് കുറവുള്ളവർ പ്രത്യേകിച്ചും നടുവേദനയുടെ ബുദ്ധിമുട്ട് ഇടക്കിടെ പറയുന്നവരാണ്.

ഗർഭാവസ്ഥ, തുടർച്ചയായ പ്രസവങ്ങൾ,  മുലയൂട്ടൽ, പലതരം രോഗങ്ങൾ,  തൈറോയ്ഡ്, ചില മരുന്നുകൾ, വിശ്രമമില്ലാത്ത ജോലി, അമിതവണ്ണം, വളരെനേരം നിന്ന് ചെയ്യേണ്ട ജോലി, അമിതമായി മധുരവും കൃത്രിമ ആഹാരവും കഴിക്കുക, കാലുകൾക്കും കാൽമുട്ടിലും ഉപ്പൂറ്റിയിലുമുള്ള താൽക്കാലികവും സ്ഥിരവുമായ രോഗങ്ങൾ, വെരിക്കോസ് വെയിൻ, അർശസ്, ഗർഭപാത്ര സംബന്ധമായ രോഗങ്ങൾ, വെള്ളപോക്ക്, ആർത്തവ പ്രശ്നങ്ങൾ തുടങ്ങിയവയാണ് സ്ത്രീകളിൽ പ്രധാനമായി കാണുന്ന നടുവേദനയുടെ കാരണങ്ങൾ.

അമിതാദ്ധ്വാനം, ഒരേ രീതിയിലുള്ള ജോലികൾ, കാൽമുട്ട് വേദന, മറ്റ് രോഗങ്ങൾ, മലബന്ധം, വിശ്രമമില്ലാത്ത ജോലി, കിഡ്നി രോഗങ്ങൾ, കല്ലിൻറ അസുഖം, സന്ധികൾക്കുണ്ടാകുന്ന വീക്കം, തേയ്മാനം,  കശേരുക്കൾക്കുണ്ടാകുന്ന സ്ഥാനചലനം, ഞരമ്പുകൾക്കുണ്ടാകുന്ന തടസ്സം, ശരിയായ  ചികിത്സ ചെയ്യാതെ വഷളാക്കുന്ന രോഗങ്ങൾ തുടങ്ങിയവ കൂടി മറ്റുള്ളവരിൽ രോഗ കാരണമാകാറുണ്ട്. 

അമിതമായ ടെൻഷൻ, ഉറക്കമില്ലായ്മ, അമിതാദ്ധ്വാനം, വിശ്രമമില്ലായ്മ, എങ്ങനെയെങ്കിലും ഇരിക്കുകയും കിടക്കുകയും ചെയ്യുക, തണുപ്പ്, മഴ, അധികമായി തണുപ്പേൽക്കുക, ദഹന സംബന്ധമായ ബുദ്ധിമുട്ടുകൾ തുടങ്ങിയവ എല്ലാവരിലും നടുവേദന ഉണ്ടാക്കുകയും ഉള്ളതിനെ വർദ്ധിപ്പിക്കുകയും ചെയ്യും.

നടുവേദനയുള്ളവർ വേദനാസംഹാരികൾ ഉപയോഗിക്കുകയോ ഏതെങ്കിലും തൈലം വാങ്ങി തിരുമ്മുകയോ ചെയ്യുന്നത് കണ്ടിട്ടുണ്ട്. ഇവ രണ്ടും ശരിയായ ചികിത്സ അല്ല. വേദനാസംഹാരികൾ താൽക്കാലിക ശമനം നൽകുമെങ്കിലും അവ തുടർച്ചയായി ഉപയോഗിച്ചാൽ മാത്രമേ ശമനമുണ്ടാകു എന്ന അവസ്ഥയും, തുടർച്ചയായി ഉപയോഗിക്കുന്നത് കാരണമുള്ള ബുദ്ധിമുട്ടുകളുമുണ്ടാകും. രോഗത്തിന്റെ  സ്വഭാവം മനസ്സിലാക്കാതെ തൈലം വാങ്ങി തിരുമ്മുന്നവർ ഉള്ള രോഗം വർദ്ധിക്കുവാൻ സ്വയം കാരണമാകുന്നതായി കണ്ടിട്ടുണ്ട്. ഏത് തൈലമാണ് നല്ലതെന്നോ, മറ്റു മരുന്നുകൾ കൂടി ഉപയോഗിക്കേണ്ട രോഗമാണോ, തടവിയാൽ കുറയുന്ന രോഗാവസ്ഥയാണോ, മറ്റേതെങ്കിലും രോഗവുമായി ബന്ധപ്പെട്ട നടുവേദനയാണോ എന്നൊന്നും മനസ്സിലാക്കാതെ തൈലം നന്നായി തിരുമ്മി അസുഖം വർദ്ധിപ്പിക്കുന്നവരും ധാരാളമുണ്ട്. 

ചിലർക്കെങ്കിലും മരുന്ന് കഴിച്ചാലുടൻ വേദന മാറണം. അസുഖത്തിന്റെ സ്വഭാവം എന്തുതന്നെയായിരുന്നാലും അഥവാ അസുഖം കുറഞ്ഞില്ലെങ്കിലും വേദന മാറണമെന്നാണ് അവർ ആവശ്യപ്പെടുന്നത്. ആയുർവേദത്തിൽ താൽക്കാലിക രോഗശമനത്തിന് അത്ര പ്രാധാന്യമില്ല.  അതല്ല ചികിത്സയുടെ ഉദ്ദേശവും. മരുന്നുപയോഗിച്ച് രോഗം കുറയുന്ന മുറയ്ക്ക് രോഗത്തിൻറ ലക്ഷണങ്ങളും കുറഞ്ഞുവരും. അതിനാൽ ഒരല്പം സാവകാശമുള്ളവരാണ് ആയുർവേദ ചികിത്സയിലേക്ക് പോകേണ്ടത്. മരുന്നുപയോഗിച്ച് വീട്ടിലിരുന്നും, ആശുപത്രിയിൽ കിടന്ന് പഞ്ചകർമ ചികിത്സകൾക്ക് വിധേയമായും ചികിത്സിക്കേണ്ടി വരാം. തടവും കിഴിയും മാത്രമാണ് നടുവേദനയുടെ ചികിത്സ എന്ന് ആരും ചിന്തിച്ചു കളയരുത്. ചികിത്സ തേടുന്നത് ശരിയായ വിദ്യാഭ്യാസ യോഗ്യതയുള്ളവരിൽ നിന്നു തന്നെ ആയിരിക്കുകയും വേണം. വേദനയുള്ളപ്പോൾ വിശ്രമമില്ലാതെ നടുവേദനയ്ക്കുള്ള ചികിത്സ ചെയ്തിട്ട് കാര്യമില്ല.

സർക്കാർ ആയുർവേദ സ്ഥാപനങ്ങളിൽ നിന്നും ലഭിക്കുന്ന ചികിത്സകൾ സൗജന്യമാണ്. വീട്ടിലിരുന്ന് മരുന്ന് കഴിക്കുവാനേ നിർവാഹമുള്ളൂ എന്നുള്ളവർക്ക് രോഗത്തിന്റെ പ്രാരംഭ ഘട്ടത്തിൽ ആയുർവേദ ഡിസ്പെൻസറികളിൽ നിന്നും, കിടത്തി ചികിത്സ അനിവാര്യമായിരിക്കുന്നവർക്ക് ആയുർവേദ ആശുപത്രികളിൽ നിന്നും ചികിത്സ ലഭിക്കും. രോഗവർദ്ധനവിനെ ഉണ്ടാക്കുന്ന അപഥ്യങ്ങൾ ഒഴിവാക്കിയും രോഗശമനത്തിനെ ചെയ്യുന്ന കാര്യങ്ങൾ ഉൾപ്പെടുത്തിയും നടുവേദനയ്ക്കുള്ള ആയുർവേദ ചികിത്സ ഫലപ്രദമാക്കാം.

ലേഖകൻ: ഡോ. ഫൈസൽ ഖാൻ, BAMS

നടുവേദനയുള്ളവർ വേദനാസംഹാരികൾ ഉപയോഗിക്കുകയോ ഏതെങ്കിലും തൈലം വാങ്ങി തിരുമ്മുകയോ ചെയ്യുന്നത് കണ്ടിട്ടുണ്ട്. ഇവ രണ്ടും ശരിയായ ചികിത്സ അല്ല.