തടിച്ചും വളഞ്ഞു പുളഞ്ഞും കാണുന്ന സിരകളെയാണ്‌ വെരിക്കോസ് വെയിൻ അഥവാ സിരാഗ്രന്ഥി എന്നു പറയുന്നത്. ശരീരത്തിൽ എവിടെ വേണമെങ്കിലും വരാവുന്നതാണെങ്കിലും സാധാരണയായി കാലുകളിലാണ് ഇവ കാണുന്നത്. കാലിലെ പാദവുമായി ചേരുന്ന സന്ധിയ്ക്കടുത്തായി ചികിത്സിച്ചു ഭേദമാക്കുവാൻ ബുദ്ധിമുട്ടുള്ള വ്രണമായും പിന്നീട് ഇവ മാറാറുണ്ട്.

സ്ഥിരമായി നിൽക്കുകയോ ഇരിക്കുകയോ ചെയ്യുന്ന രീതിയും അങ്ങനെ ചെയ്യേണ്ടി വരുന്ന ജോലിയും ഉള്ളവരിലാണ് ത്വക്കിനടിയിലെ സിരകളിലെ പോക്കറ്റ് വാൽവുകൾക്ക് കേടു വന്ന് വെരിക്കോസ് വെയിൻ ആയി മാറുന്നത്. പാരമ്പര്യമായും, വണ്ണക്കൂടുതൽ ഉള്ളവരിലും, സ്ഥിരമായി നിന്ന് ജോലി ചെയ്യേണ്ടിവരുന്നവർക്കും, ഗർഭിണികൾക്കും, പ്രായക്കൂടുതൽ കൊണ്ടും ഇവ ഉണ്ടാകുകയോ ഉള്ളത് വർദ്ധിക്കുകയോ ചെയ്യാം. 

വളരെ അപകടം പിടിച്ച അസുഖമെന്ന നിലയിൽ വെരിക്കോസ് വെയിനിനെ കാണേണ്ടതില്ലെങ്കിലും അതുണ്ടാക്കുന്ന ബുദ്ധിമുട്ടും വേദനയും ചികിത്സിച്ചാലും പെട്ടെന്ന് മാറാത്ത വ്രണവും, അതുകാരണമുള്ള പ്രയാസങ്ങളും ചെറുതല്ല. വ്രണത്തിന് പലപ്പോഴും ദുർഗന്ധവും നല്ല വേദനയും ഉണ്ടാകും. ഇടയ്ക്കിടെ ഹൃദയത്തിൻറ ലെവലിൽ കാലുകൾ ഉയർത്തി കിടക്കുക, ചെറിയ തോതിലുള്ള വ്യായാമങ്ങൾ ചെയ്ത് പേശികളെ ബലപ്പെടുത്തുക, ശരീരഭാരം കുറയ്ക്കുക, കൂടുതൽ നേരം നിന്നും ഇരുന്നുമുള്ള ജോലി ഒഴിവാക്കുക, ഇലക്കറികളും പഴവർഗങ്ങളും ധാരാളം കഴിക്കുക, കാലിലെ മസിലുകൾക്കും സിരകൾക്കും സപ്പോർട്ട് നൽകും വിധം സോക്സ്, സ്റ്റോക്കിങ്സ് മുതലായവ ഉപയോഗിക്കുക, ആയുർവേദ ഔഷധങ്ങൾ ഉപയോഗിച്ച് കാലുകളിലെ രക്തസഞ്ചാരം വർദ്ധിപ്പിക്കുന്ന ചികിത്സകൾ ചെയ്യുക തുടങ്ങിയവയാണ് പരിഹാരമാർഗ്ഗങ്ങൾ.

വണ്ണമുള്ളവരിൽ പെട്ടെന്ന് വണ്ണം കുറയ്ക്കുന്നത് എളുപ്പമല്ലെന്ന് അറിയാമല്ലോ? വെരിക്കോസ് വെയിൻ ഉളളവർ നിന്ന് കൊണ്ട് ചെയ്യുന്ന ജോലി കുറച്ചാൽ തന്നെ കാലുകൾക്ക് തോന്നുന്ന വേദനയും കടച്ചിലും വലിച്ച് മുറുക്കുന്ന പ്രയാസങ്ങളും കഴപ്പും ചൊറിച്ചിലും കുറയും. മരുന്ന് കൂടി ഉപയോഗിച്ച് മാത്രമേ വെരിക്കോസ് വെയിൻ സുഖപ്പെടുത്തുവാൻ സാധിക്കൂ. വേദനാ സംഹാരികളെയും  മറ്റ് ചികിൽസകളെയും ആശ്രയിക്കുന്നതിന് മുൻപ് തന്നെ ആയുർവേദം ഉപയോഗിക്കാവുന്നതാണ്. ചില തരം ചികിൽസകൾ കൊണ്ട് താൽക്കാലിക ആശ്വാസം ലഭിക്കുമെങ്കിലും രോഗം കൂടുതൽ വഷളായി പ്രശ്നങ്ങൾ വർധിക്കുന്നവരും കുറവല്ല. ഉണങ്ങാൻ പ്രയാസമേറിയ വ്രണങ്ങളുമായി വർഷങ്ങളോളം ബുദ്ധിമുട്ട് അനുഭവിക്കുന്നവരും വിരളമല്ല.

പ്രമേഹം, പ്രഷർ, ഹൃദയ സംബന്ധമായ ബുദ്ധിമുട്ടുകൾ, അലർജി രോഗങ്ങൾ, വണ്ണം തുടങ്ങിയവ ഉള്ളവർക്കുണ്ടാകുന്ന വെരിക്കോസ് വെയിൻ മറ്റുള്ളവർക്ക് ഉണ്ടാക്കുന്ന ബുദ്ധിമുട്ടുകളേക്കാൾ കൂടുതൽ രൂക്ഷമാകാറുണ്ട്. അവർക്കുള്ള ചികിത്സ ഫലപ്രദമാകാൻ കൂടുതൽ പ്രയാസവുമാണ്. അത് പരിഹരിക്കാൻ വെരിക്കോസ് വെയിൻ ഉള്ളവർ തുടക്കത്തിൽ തന്നെ ആയുർവേദ ചികിത്സകൾക്ക് വിധേയമാകേണ്ടതാണ്.

വെരിക്കോസ് വെയിനിന് വളരെ ഫലപ്രദമായ ചികിത്സകൾ ആയുർവേദ സ്ഥാപനങ്ങൾ വഴി ലഭിക്കുന്നുമുണ്ട്...

(ലേഖനം: ഡോ. ഷർമദ് ഖാൻ BAMS, MD, സീനിയർ മെഡിക്കൽ ഓഫീസർ, ഗവ. ആയുർവ്വേദ ഡിസ്പെൻസറി, നേമം)

സംശയങ്ങൾക്കും മറുപടികൾക്കും 94479 63481 എന്ന ഫോൺ നമ്പറിൽ ബന്ധപ്പെടുക.

പാരമ്പര്യമായും, വണ്ണക്കൂടുതൽ ഉള്ളവരിലും, സ്ഥിരമായി നിന്ന് ജോലി ചെയ്യേണ്ടിവരുന്നവർക്കും, ഗർഭിണികൾക്കും, പ്രായക്കൂടുതൽ കൊണ്ടും ഇവ ഉണ്ടാകുകയോ ഉള്ളത് വർദ്ധിക്കുകയോ ചെയ്യാം.